'Beɔ Dafi 'a 'dʋ ‑ɛɛ poa Kea ‑ɛ ‑sɔ tʋ "kpei sɛ'
(2 Samiɛ 22.1-51)
18
'Dʋ "jru o ‑tei, Dafi ‑ɔ ‑nɩa Kea 'a dbonʋɩ 'a 'dʋ ‑wlʋa 'e 'dʋsbɛpun 'di ɛ. ‑Sɔntɩ Tʋ "bo ‑seie ɔ 'de nyʋ ‑nyɛɔ 'ʋn ke Sailɩ 'kwa a 'bomɔ ɔ ‑tuɛ" 'e.
2 Ɔ 'na: 'Ma 'jeɛ ɛɛ' "dia, 'oo Tʋ "bo 'ma 'kpɩ.
3 Tʋ "bo, 'ma ‑kliosou", 'ma ‑gblo", 'ma ‑seie i,
'ma Kea, 'ma ‑kliosou" ‑nɩa 'ma "jru 'wlaa ‑ta a,
'ma "i kaan i, 'kpɩ ‑ɛɛ ‑pʋʋa' 'ʋn ɛ, 'ma sro' 'wlaa na'.
4 Tʋ "bo 'a 'nynɩ "bɛi, ‑bo 'ɩn poɛ ‑too" "i
'sʋ ɛ ‑seie 'ʋn 'ɛ 'de 'ma tʋnyʋ 'kwa.
5 'Mɛa' ‑pin' 'ʋn 'ɛ 'de‑,
ɛɛ' "ni waa 'ʋn ‑gba kwa, ɛ 'dbaa 'ʋn faʋn "i.
6 Ɛ pooɛ 'ʋn nya" sai 'dei.
'Ɩn 'kpa 'e ɛɛ' ‑sepɩɛ 'di.
7 'Kle ‑nɛ, ɛmɛ 'ɩn nɩ 'e 'di ‑wɛe 'ɩn po Tʋ "bo ‑too" "i,
ɛ nɩɛ 'e ɛɛ' 'beɔ ‑gbu 'di ɛ je 'ma 'dawlu 'wɔn,
'ma weewlu jeɛ doun" 'kpa.
8 'Sʋ 'blʋa ‑suua' i, ɛɛ crɛ',
crɩ ‑wee'‑ ‑gbuun" a "i 'de Kea 'a 'cɛn "juɛi.
9 Dao' a 'wlʋɛ 'mlai tuei‑
nɛmɩɔ ke nɛklɩn' ‑a ‑wlʋa 'de ɛ 'wɔn ɩa siian dɩ.
10 Tʋ "bo jaa jaʋn ja ‑wɛe ɛ "si i 'bo bue" "kpei.
11 Ɛ 'jao selibɛn'a due' "kpei
‑wɛe ɛ ke ‑piie a ji.
12 Ɛ pa 'e kwie kpan 'di ka nyɔ ɔ pa 'e ‑gbu" 'di
‑wɛe ɔɔ "fiian dɛ i ɛ, ‑wɛe "ni ‑nɩa suɛnsuɛn poɛ 'e 'sʋ ɛ "sii ɛ "i.
13 "Ni 'a "jrii crɛa' ke bue" ke nɛ ke
‑cnɩ ke ɩmɩ ‑kɔn 'e ɛ "juɛi.
14 Tʋ "bo ‑nɩa 'e jaʋn 'di,
Kea ‑nɩa 'e dɩ ‑wee'‑ "klein "jrukpɔ' 'ɔ wlu ka
‑tɛn ɛ "plaan ‑wɛe ɛɛ 'kpaa.
15 Tʋ "bo pooa ɛɛ' tʋnyʋ 'sɩn kan' 'sʋ ʋʋ 'kpaa 'kwlɩ i,
ɛɛ' ‑tɛn "plaan ʋʋpʋ‑ "jrui kan' 'sʋ ‑je "maa ʋʋpʋ‑ "jrii.
16 'Oo Tʋ "bo, ‑bo ɛ crɛɛ nyʋ ‑cɩɛi",
‑bo ɛ ‑sa 'nʋ 'mla i 'sʋ 'tɔniɛ ‑sɔn nyɩaai",
'sʋ 'kmʋ ‑wee'‑ pooɛ ‑gbɔo "jɛi.
17 Tʋ "bo ‑nɩa 'e "jɛi
'je sʋn kpa ɛ je 'ʋn kpʋn ɛ je 'ʋn "ni ‑tun ‑sa.
18 Ɛmɛ ‑sa 'ʋn "ikma tʋnyʋ ke
nyʋ "klein" ‑siia 'ʋn wɔn ‑wɛe ‑ʋʋa ‑flɛɛan 'ʋn 'kwa
19 ‑Ta "ikma ‑tɩ jɛɛa 'ʋn 'bo ʋʋ 'plee 'ʋn "kpei,
'kaa 'ɩn 'pɛn 'de Tʋ "bo jai.
20 ‑Wɛe ɛ ‑seie 'ʋn, 'de ɛ 'pʋʋ 'ʋn
dɛ ‑nʋɛ, ɛ kma 'ma ‑tɩ'.
21 Ka 'ma dɩ ‑wee'‑ ‑klɛɛai" 'kamɔ Tʋ "bo kpʋn 'ʋn,
ka 'ma kwa nɩa' kplakpla, 'kamɔ ɛ ‑sa 'ʋn ‑kei".
22 'Ɩn ‑tuɛ" Tʋ "bo 'a ‑je "jriɛ‑
'ɩn se 'ma Kea 'kpʋ "i to‑ ka 'diwɔnyniʋn nɩa.
23 Ɛɛ' 'tee ‑wee'‑ nɩɛ 'ʋn "juɛi ‑ta,
'ɩn se ɛɛ' kɛ' jrɛ' "i ‑gbla" "pɩ.
24 'Ɩn se "bli ‑cɛ" dɛ jrɛ' nʋ,
'ɩn 'soo 'de 'ma ‑cɛ" 'ɛ kplɩn saɩn ‑pʋn".
25 'De 'ma ‑tɩ' "i ‑klɛɛ ‑tɩ 'ʋn,
'ma kwa 'a 'pepe nɩ ‑tɩ 'ʋn ɛ,
Tʋ "bo a ‑gbʋɛn' 'ʋn "jri 'dɔe ja.
26 Ɛ nmɔ 'diwɔn 'de 'diwɔnmɔ i ‑pee.
Ɛɛ ‑klɛɛ ‑tɩ' "i 'de ‑tɩ' "i ‑klɛɛ i ‑pee
27 Ɛ nɩɛ kplakpla 'de kplakpla nɩ i ‑pee,
Ɛɛ nʋɛ' 'sʋ kplɔn" nyɔ ɔ jea kplɔn" ‑tɩ 'je.
28 Ɛmɛ ‑ɛɛ ‑pʋʋ' 'cɛ ‑ʋʋa ‑piia' ʋʋa' ‑cɛi" ɛ,
ɛmɛ ‑ɛɛ ‑cra' "jri ‑a poa "soi "i
29 Kɩɩn, Tʋ "bo, 'ma Kea, ɛmɛ ‑nɩ 'ma ‑sɔn',
‑ɛ ‑cɛɛn 'ʋn kwie "jrii.
30 Ɛ ke 'ma duɛ tʋ,
'ma Kea ke 'ma ‑sa ‑kwlɔ ‑pooa 'saan 'dei ɛ.
31 Kea 'a ‑jeblʋ ‑wee'‑ "srɛi.
Tʋ "bo 'a wlu ‑wee'‑ a "sii'.
Ɛ nɩɛ nɩɩɛklu ‑ɛɛ kaan nyʋ ‑ʋʋ ‑teɛ' ‑kwlɩ" "i.
32 'De ‑ɔ ‑nɩ Kea ‑bo ɛ se Tʋ "bo nɩ ɛ?
'De ‑ɔ ‑nɩ ‑kliosou" ‑bo ɛ se ‑aa Kea nɩ ɛ?
33 Kea mɛ ‑nyɩ" 'ʋn ‑jeblʋ ‑srɛai" 'a kpaa' 'a 'kpɩ,
‑wɛe ‑ɛɛ po 'ʋn ‑jeblʋ ‑cɛɛn'‑ o.
34 Ɛmɛ ‑ɛɛ nʋɛ ‑wɛe 'ɩn 'ble kɔɔkpa 'a plekpɩ‑,
'de 'ɩn 'bɛɛ crʋ 'a ‑peenai" naa'.
35 Ɛmɛ ‑ɛɛ tɔɔ 'ʋn ‑gba,
‑ɛɛ kuu 'ma sʋn i ‑wɛe 'ɩn 'bɛɛ nɩɩɛplʋ 'ʋn ‑criia'.
36 Tʋ "bo, ɛɛ' nyʋ 'pʋʋ sʋn mɛ ‑kpʋn' 'mii,
‑wɛe ɛ 'bɛɛ 'mii" 'de ɛɛ' 'diwɔnmɔa' 'ʋn
37 Ɛmɛ ‑po' ‑je de 'de 'ʋn "juɛi
‑wɛe 'ma nabʋ 'a ‑gblia"‑.
38 'Ma nʋɛ 'ma tʋnyʋ i 'ma jea ʋʋ jɛɛ,
'ma kpʋn ʋʋpʋ‑ 'kwai.
'Maa ji de ‑bo 'ɩn se ʋʋpʋ‑ 'a ma" i ‑sa a.
39 'Ma ‑craa ʋʋpʋ‑ i, ʋʋ se "jru "jɛi kpaa' 'bɛɛ‑ 'bode;
ʋʋa 'wla 'blae 'de 'ʋn bɩ wɛi.
40 Tʋ "bo, ɛmɛ ‑ɛ ‑nyɩ" 'ʋn ‑gba 'a 'kpɩ,
‑ɛɛ nʋɛ' ‑wɛe 'ma o ‑fɔn' ʋn a tba wɔn 'blʋɔ i 'bo 'ʋn ‑sɔn.
41 Ɛɛ nʋɛ' 'ma tʋnyʋ a jea 'kpʋ to 'bo 'ʋn "juɛi
'de 'ma ‑sa 'ma 'ʋn 'nyɛ nyʋ i
42 Ʋʋ po ‑too" "i 'mɛ 'kaa nyɔ ‑jea ʋʋ 'pʋʋ ɔ se nɩ‑.
Ʋʋa 'da Tʋ "bo 'mɛ, 'kaa ɛɛ' 'wɔn ʋʋpʋ‑.
43 'Ma cɛn ʋʋpʋ‑ 'mlʋ ka nyɔ ɔ ‑gba' "puue "jɛi
‑wɛe pooɔ' ɔ kpɛ ɛ, 'ɩn 'bleeɛ ʋʋ bɩ "i ka nyɔ dua 'pɔɔ ɛ.
44 Ɛmɛ ‑sa 'ʋn 'de nyʋ ‑nynaa "jrui 'bo 'ʋn ‑pee 'kwa.
Ɛmɛ ‑te' 'ʋn 'blʋa jrɩ' "jru o i,
Nyʋ ‑jʋ 'ɩn sea juuo ‑wee'‑ a jaa "jru ja 'de 'ʋn ‑sɔn.
45 ‑Bo 'ɩn nʋ sʋʋ‑ 'sʋ ʋʋa 'jeɛ 'ʋn wɔn.
Nyʋ 'srʋ 'a "nynuu‑ mʋ ‑ʋʋa po 'ʋn ‑tɩ' o
46 nyʋ 'srʋ mʋ 'kpɩ a 'mɛ i,
‑ʋʋ se "jru 'wlaa ‑ta 'ble ‑wɛe ‑ʋʋa 'kɔi a bɔɔ wɔn.
47 Tʋ "bo nɩɛ 'kmʋ "diwan‑ kpʋn 'ma ‑kliosou".
Kea ‑nɩa 'ma 'pʋʋ i 'wlʋ 'nynɩ.
48 Kea ‑nɩa 'ma kpan o ‑sai ɛ,
ɛmɛ ‑dba nyʋ jrʋ' 'bo 'ʋn "juɛi ‑ɛ ‑nyɩ" ʋʋpʋ‑ 'ʋn
49 Ɛ ‑seie 'ʋn 'de 'ma tʋnyʋ 'kwa,
ɛmɛ ‑ɛɛ kpa 'ma "jru "jɛi 'de ʋʋ "kpei,
‑ɛɛ ‑sa 'ʋn 'de ‑cruun"‑ 'bleʋn 'kwa.
50 Ɛmɛ ‑tɩ 'oo Tʋ "bo, 'ɩn 'jeɛ 'nynɩ ‑sa ‑o 'de nyiɔpʋ‑ "klu,
‑wɛe 'ɩn 'je ble 'ɩn 'je ɛɛ' 'nynɩ "i 'bɛɛ‑
51 'Blʋajei Dafi ke ɔɔ' "ji ɛ poa 'cna "jru ɛ ‑seie ʋʋpʋ‑ 'mɛ
'de dɩ klae" klae" 'wɔn, ɛ nmɔ 'diwɔn 'de ʋʋ ‑pee jeejee.